ភ្នំពេញ៖ គេហទំព័រទេសចរណ៍ Touropia បានចុះផ្សាយថាក្នុងចំណោមទីតាំងទេសចរណ៍ចំនួន២៩ដែលល្បីៗនៅតំបន់អាស៊ាន ប្រាសាទអង្គវត្តរបស់កម្ពុជាគឺជាទីតាំងទេសចរណ៍ដែលអ្នកទេសចរណ៍មិនគួររំលងបានដោយសារទីតាំងនេះបន្សល់នូវវប្បធម៌សំខាន់ៗជាច្រើន និងមានប្រាសាទជាច្រើនទៀតនៅពាសពេញព្រៃនៃតំបន់អង្គរវត្ត។

ក្រៅពីតំបន់ប្រាសាទអង្គរវត្ត រាជធានីភ្នំពេញ និងខេត្តព្រះសីហនុ ក៏ត្រូវបានគេហទំព័រនេះចាត់ចូលជាទីតាំងដែលអ្នកទេសចរគួរទៅទស្សនាផងដែរ។

ក្រោយពីរងផលប៉ះពាល់ពីជំងឺកូវីដ-១៩ ជាង៣ឆ្នាំមកនេះពិភពលោកកំពុងវិលត្រលប់ទៅរកភាពប្រក្រតីឡើងវិញតាមបែបគន្លងថ្មី ជើងយន្តហោះនៃប្រទេសមួយចំនួនត្រូវបានបើកឡើងវិញជាបន្តបន្ទាប់ដែលធ្វើឱ្យមានចរន្តងើបឡើងវិញនៃទេសចរណ៍និងវិនិយោគទុន។

កាលពីថ្ងៃទី១ វិច្ឆិកា នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រកាសបើប្រទេសទាំងស្រុងឡើងវិញដើម្បីស្ដារសង្គមសេដ្ឋកិច្ចឡើងវិញ ស្របពេលដែលកម្ពុជានឹងបើកទទួលទេសចរណ៍វ៉ាក់សាំងនៅ ក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងនៅតារាសាគរនៃខេត្តកោះកុង នៅថ្ងៃទី៣០ ខែវិច្ឆិកា និងនៅខេត្តសៀមរាបនៅខែមករា ឆ្នាំ២០២២៕